ॲग्रोन्युज परिवार चॅरिटेबल ट्रस्ट फलटणचा धर्मवीर छत्रपतीसंभाजी महाराज साहित्य सेवा पुरस्कार जेष्ठ साहित्यिक सुनील दबडे यांना जाहीर
आटपाडी kd24news :ॲग्रोन्युज परिवार चॅरिटेबल ट्रस्ट फलटणचा धर्मवीर छत्रपतीसंभाजी महाराज साहित्य सेवा पुरस्कार जेष्ठ साहित्यिक सुनील दबडे यांना जाहीर करण्यात आला आहे . ॲग्रोन्युज परिवाराचे प्रा . विजय काकडे आणि प्रकाश सस्ते यांनी ही माहिती पत्राव्दारे दबडे यांना कळविली आहे .
फलटण येथील नवलबाई मंगल कार्यालयात २७ फेब्रुवारी रोजी होणाऱ्या धर्मवीर छत्रपती संभाजी महाराज राज्यस्तरीय मराठी साहित्य संमेलनात दबडे यांना हा पुरस्कार देण्यात येणार आहे .
सुनील दबडे यांच्या ' बनगी आणि बिरमुटं ' . या कथासंग्रहाला हा पुरस्कार जाहीर झाला आहे . विटा येथील ग्रामीण साहित्य संमेलनात अखिल भारतीय मराठी साहित्य संमेलनाचे पूर्वाध्यक्ष श्रीपाल सबनीस यांच्याहस्ते या कथासंग्रहाचे प्रकाशन झाले होते . माडगुळे येथील शिदोरी साहित्य संमेलनात या कथासंग्रहावर नुकताच रंगतदार परिसंवादही झाला आहे . या कथासंग्रहाची पाठराखण महाराष्ट्रातील सुप्रसिद्ध वक्ते आणि विचारवंत इंद्रजीत देशमुख ( काकाजी ) यांनी केली आहे . बदलत्या माणदेशाचे प्रभावी चित्रण या कथासंग्रहातून करण्यात आले आहे . या कथासंग्रहाला वाचकांकडून चांगला प्रतिसाद मिळत आहे .
सुनील दबडे यांची यापूर्वी चार पुस्तके प्रसिद्ध झाली असून त्यांना राज्यातील अनेक प्रतिष्ठेच्या साहित्य व सेवा सन्मान पुरस्कारांनी गौरविण्यात आले आहे . राज्यभर विविध विषयांवर त्यांनी शेकडो व्याख्याने दिली आहेत . अनेक शैक्षणिक व साहित्यिक उपक्रमांचे त्यांनी यापूर्वी आयोजन केले आहे . शासनामार्फत राबविण्यात आलेल्या अनेक ठिकाणच्या परिचर्चेत त्यांनी अनेकवेळा सहभाग घेतला आहे . नवोदित कवी व लेखकांना अनेक लेखनाच्या कार्यशाळांतून त्यांनी मार्गदर्शन केले आहे . आकाशवाणीच्या विविध केंद्रावरून तसेच टिव्ही ९ या मराठी चॅनेल वरून त्यांचे साहित्यिक कार्यक्रम प्रसारित झाले आहेत . त्यांनी मिळविलेल्या या यशाबद्दल त्यांचे विविध क्षेत्रांतल्या मान्यवरांनी अभिनंदन केले आहे .
